បាត់ដំបង៖ លោកឧត្តមសេនីយ៍ត្រី ហែម វុទ្ធី មេបញ្ជាការកងរាជអាវុធហត្ថខេត្តបាត់ដំបង និងជាអនុប្រធានអចិន្ត្រៃយ៍គណៈកម្មការកាតព្វកិច្ចយោធាខេត្ត បានដឹកនាំប្រតិភូអមដំណើរ និងមន្ត្រីជំនាញ ចុះត្រួតពិនិត្យផ្ទាល់លើដំណើរការទទួលពាក្យសុំចូលបំពេញកាតព្វកិច្ចយោធា សម្រាប់ឆ្នាំ២០២៦ នៅតាមក្រុង-ស្រុកទាំង១៤ ក្នុងខេត្តបាត់ដំបង នាព្រឹកថ្ងៃទី០១ ខែតុលា ឆ្នាំ២០២៦។

ជាការឆ្លើយតបតាមការណែនាំរបស់ឯកឧត្តម សុខ លូ អភិបាលនៃគណៈអភិបាលខេត្តបាត់ដំបង ស្ដីពីការយកចិត្តទុកដាក់ចំពោះសុខទុក្ខ និងជីវភាពរស់នៅរបស់ប្រជាពលរដ្ឋ ដែលរងផលប៉ះពាល់ដោយជំនន់ទឹកភ្លៀង កាលពីថ្ងៃទី៣០ ខែកញ្ញា ឆ្នាំ២០២៦ កន្លងទៅនេះ ក្រុមការងាររដ្ឋបាលក្រុងបាត់ដំបង បាននាំយកអំណោយទៅចែកជូនដល់បងប្អូនប្រជាពលរដ្ឋចំនួន ៥០ គ្រួសារ នៅភូមិគោកពន្លៃ សង្កាត់ពូម៉ាល់ ក្រុងបាត់ដំបង។

សមាគមអតីតយុទ្ធជន និងនិវត្តជនកម្ពុជា ស្រុករតនៈមណ្ឌល ខេត្តបាត់ដំបង ដឹកនាំដោយលោក នូវ ឫទ្ធី អភិបាលរងនៃគណៈអភិបាលស្រុករតនៈមណ្ឌល បាននាំយកថវិកាមរណៈសង្គ្រោះរបស់ អ.ន.ក. ទៅប្រគល់ជូនគ្រួសារសពអតីតយុទ្ធជន ឈ្មោះ ឆក វឿន ភេទប្រុស អាយុ ៦១ ឆ្នាំ អត្តលេខ HA ៩០០០០៨៨៣ (ជនពិការ) ដែលបានទទួលមរណភាពកាលពីថ្ងៃទី ២១ ខែកញ្ញា ឆ្នាំ ២០២៦ ដោយជរាពាធ។

បាត់ដំបង៖ ម៉ូតូសណ្តោងរ៉ឺម៉កដឹកខ្សាច់មួយគ្រឿង បានបើកឆ្លងកាត់ស្ពានយោលស្ទឹងសង្កែ ជិតដល់ចុងស្ពានម្ខាងហើយ ក៏ស្រាប់តែបាក់ក្ដារស្ពាន ធ្លាក់ទាំងម៉ូតូ និងរ៉ឺម៉កចូលទៅក្នុងស្ទឹងសង្កែ។ ប៉ុន្តែសំណាងល្អ អ្នកបើកបរបានស្រវ៉ាតោងខ្សែស្ពានយោលជាប់ ទើបមិនបណ្តាលឱ្យមានគ្រោះថ្នាក់ដល់ជីវិត។

បាត់ដំបង៖ ក្រុមចម្រុះរដ្ឋបាលក្រុងបាត់ដំបង បានចុះពិនិត្យ និងពន្លឿនការរុះរើសំណង់ និងសម្ភារៈនានា របស់ម្ចាស់ម៉ាត HCL (ដែលជាក្រុមហ៊ុនតែមួយជាមួយផ្សារហេងឆៃលីដែលឆេះកន្លងមក) ចេញពីទីតាំងដែលមិនមានច្បាប់អនុញ្ញាតិ កាលពីថ្ងៃទី ១៥ ខែកញ្ញា ឆ្នាំ ២០២៦។

បាត់ដំបង៖ ដើម្បីលើកកម្ពស់ប្រសិទ្ធភាពការងារ និងឆ្លើយតបឱ្យបានទាន់ពេលវេលាចំពោះតម្រូវការរបស់ប្រជាពលរដ្ឋ កាលពីព្រឹកថ្ងៃទី ៣១ ខែសីហា ឆ្នាំ ២០២៦ លោកវរសេនីយ៍ទោ ទឹម វិឆ័យ អធិការនគរបាលស្រុកសំពៅលូន បានដឹកនាំក្រុមការងារជំនាញ ចុះពិនិត្យ និងតាមដានយ៉ាងយកចិត្តទុកដាក់លើវឌ្ឍនភាពការងារដល់ប៉ុស្តិ៍នគរបាលរដ្ឋបាលតាស្តា។