លោកស្រី ធឿន សោភារី មន្ត្រីកម្មវិធីអាហារូបត្ថម្ភ នៃមន្ទីរសុខាភិបាល នៃរដ្ឋបាលខេត្តសៀមរាប បានមានប្រសាសន៍ថា ការបំបៅកូនដោយទឹកដោះម្ដាយ គឺជាវិធីដ៏សំខាន់មួយក្នុងការផ្តល់អាហារូបត្ថម្ភដល់ទារក និងជួយឱ្យកុមារលូតលាស់បានល្អ ទឹកដោះម្ដាយមានសារធាតុចិញ្ចឹមសំខាន់ៗ ដែលសមស្របនឹងតម្រូវការរបស់ទារក ជាពិសេសក្នុងអំឡុងពេលប៉ុន្មានខែដំបូងនៃជីវិត ។ លោកស្រីមានប្រសាសន៍ដូច្នេះ ក្នុងកម្មវិធីសន្ទនាមតិ របស់វិទ្យុ និង ទូរទស្សន៍ជាតិខេត្តសៀមរាប កាលពីថ្ងៃទី២៩ ខែកញ្ញា ឆ្នាំ២០២៦ កន្លងទៅថ្មីៗនេះ។

មន្ត្រីជាន់ខ្ពស់ក្រសួងទេសចរណ៍ និងរដ្ឋបាលខេត្តសៀមរាប បានអំពាវនាវដល់ម្ចាស់អាជីវកម្ម និងអ្នកបម្រើសេវាកម្មស្ប៉ា និងសម្រួលសរសៃ ឱ្យខិតខំពង្រឹងគុណភាពសេវាកម្ម តាមដានការអភិវឌ្ឍសមត្ថភាពជាប្រចាំ និងប្រតិបត្តិការងារប្រកបដោយក្រមសីលធម៌វិជ្ជាជីវៈ ដើម្បីឆ្លើយតបទៅនឹងបរិបទនៃសម័យកាលឌីជីថល និងតម្រូវការរបស់ភ្ញៀវទេសចរ។

នៅថ្ងៃទី៧ ខែតុលា ឆ្នាំ២០២៦ លោក អ៊ឹង គឹមលាង អភិបាលរងខេត្តសៀមរាប បានដឹកនាំក្រុមការងារ និងមន្ត្រីជំនាញចុះផ្សព្វផ្សាយអំពីច្បាប់ និងសេចក្ដីជូនដំណឹង ស្ដីពីរដូវបើកនេសាទតាមដងទន្លេសាបក្នុងភូមិសាស្ត្រខេត្ត ដើម្បីការពារត្រីមេពូជ និងធានានិរន្តរភាពធនធានជលផល ដែលការចុះផ្សព្វផ្សាយនេះ ធ្វើឡើងនៅវត្ដកំពង់ឃ្លាំង ឃុំកំពង់ឃ្លាំង។

ការចិញ្ចឹមត្រីអណ្ដែង គឺជាមុខរបរកសិកម្មមួយដែលចំណាយដើមទុនតិច ប្រើរយៈពេលខ្លីត្រឹមតែ ៣ខែ នឹងអាចរកចំណូលបានខ្ពស់សម្រាប់គ្រួសារ ខណៈត្រីអណ្ដែងជាប្រភេទត្រីងាយស្រួលចិញ្ចឹម ធន់នឹងមជ្ឈដ្ឋានជុំវិញ និងមិនសូវរើសចំណីឡើយ។

នៅព្រឹកថ្ងៃទី៧ ខែតុលា ឆ្នាំ២០២៦ អាជ្ញាធរខេត្តសៀមរាប បានបន្តចុះផ្សព្វផ្សាយអំពីបែបបទ នីតិវិធីនៃការទទួល ផ្តល់សេវារដ្ឋបាល នៅអង្គភាពច្រកចេញចូលតែមួយ នៃរដ្ឋបាលខេត្ត និងធ្វើការបង្ហាញពីការចូលប្រើប្រាស់កម្មវិធីព័ត៌មានវិទ្យាសម្រាប់ទទួលពាក្យស្នើសុំ និងផ្តល់សេវារដ្ឋបាលតាមប្រព័ន្ធអនឡាញ នៅអង្គភាពច្រកចេញចូលតែមួយ ជូននិស្សិតនៅសាកលវិទ្យាល័យ សៅស៍អុីសថ៍អេយសៀ (USEA) ខេត្តសៀមរាប ។

នៅថ្ងៃទី៧ ខែតុលា ឆ្នាំ២០២៦នេះ ឯកឧត្តម លី សំរិទ្ធ ប្រធានក្រុមប្រឹក្សាខេត្តសៀមរាប និង ឯកឧត្តម ប្រាក់ សោភ័ណ អភិបាលខេត្ត បានអញ្ជើញដឹកនាំសមាជិកសមាជិកាក្រុមប្រឹក្សាខេត្ត គណៈអភិបាលខេត្ត ថ្នាក់ដឹកនាំមន្ទីរអង្គភាព និងមន្ត្រីរាជការ ចូលរួមជាប្រជាពលរដ្ឋ កាន់បិណ្ឌវេនទី១១ នៅវត្តព្រះឥន្ធកោសីយ៍ ក្រុងសៀមរាប ដើម្បីឧទ្ទិសកុសលជូនដល់ញាតកាទាំង៧សន្ដាន និងវីរកងទ័ពយើងដែលបានពាលីដើម្បីបុព្វហេតុជាមាតុភូមិ។